އަޅުގަނޑުމެން މުޒާހަރާއެއް ނުކުރާނަމެވެ

ދިވެހިރާއްޖެ ޑިމޮކްރެސީގެ އުފާވެރި ފަތިހަކަށް މިހޭލީ ގިނަގުނަ ދިވެހި ރައްޔިތުންގެ މިންނެތް މަސައްކަތުންނެވެ. އަދި ޚާއްސަކޮށް އެމް.ޑީ.ޕީއަށް ނިސްބަތްވި އަދި ވާ މެންބަރުންގެ ދާ އޮހޮރުވައިގެންނޭ ބުނުމަކީ އިންސާފުން އެއްކިބާވުން ކަމަކަށް ނުވާނެއެވެ. މި ބުރަ އަދި ބޮޑު މަސައްކަތުގެ ތެރެއިން ފާހަގަ ކޮށްލެވޭ އެއް ކަމަކީ ޑިމޮކްރެޓިކް ހަމަތަކާއި އުސޫލުތަކުގެ މަތިން ބޭއްވުނު މުޒާހަރާތަކެވެ. އާންމު ރައްޔިތުންގެ ޙައްޤުތައް ހިމާޔަތްކޮށް ޤައުމުގެ މަސްލަހަތު ކުރިޔަށް ނެރުނު މި މުޒާހަރާ ތަކަކީ މުޅި ދުނިޔެއަށްވެސް ނަމޫނާ ހަރަކާތްތަކެކެވެ

.ދުނިޔެ ދައްކާފައިވާ ހަގީގަތަކީ ރައްޔިތުންނަށް ގެއްލުންދޭ ކޮންމެ ބަޔަކުވެސް ނިމިގެން ދާކަމެވެ. އެހެން ކަމުން ވަރުގަދަ ލީޑަރުން ކަންކުރެއްވީ ރައްޔިތުން ދިފާއުކޮށް ރައްކާތެރި ކުރުމަށެވެ. މަހާތުމާ ގާންދީ 2 މާޗް 1930 ގައި ފޮނުއްވި މަޝްހޫރު ސިޓީ ގައި ވަނީ ” އެކުވެރިންނޭވެ. އަހަރެންގެ އަމިއްލަ ފިކުރު ވަރަށް ސާފެވެ. އަހަރެންނަކަށް ދިރިހުރި އެއްވެސް އެއްޗަކަށް ގެއްލުމެއް ނުދެވޭނެއެވެ. އަދި އަމުދުން އިންސާނަކަށް އެފަދަ ގެއްލުމެއް ހިލާ ނުދޭނަމެވެ. އެމީހުން އަހަރެންނަށް ކިތަންމެ ގެއްލުމެއް ދިނަސް މިކަން އޮތީ މިހެންނެވެ.” ބައްލަވާށެވެ. އިގިރޭސިންގެ އިސްތިއުމާރު އިންޑިއާއިން ފޮހެލެވެންދެން ހަޅުތާލުކުރެއްވި ނަމަވެސް އެއްވެސް މީހަކަށް ގެއްލުމެއް ލިބޭފަދަ އަމަލެއް ނުހިންގަވައެވެ. ނަތީޖާ އެއޮތީ ފެންނާށެވެ. ދުނިޔޭގެ އެންމެ ބޮޑު ޑިމޮކްރެސީގެ ބައްޕަ ކަމުގައި ރައްޔިތުން ގާންދީ ބަލައިގަތީ އެހެންވެއެވެ. ހަމަ މިހެން 1963 ގައި ޑރ.މާޓިން ލޫތާރ ކިންގު ދެއްވި ‘އަހަރެންގެ ހުވަފެނެއް ވެއޭ’ ކިޔާ މަޝްހޫރު ސްޕީޗް ގައި ވަނީ “އަހަރެމެން އަހަރެމެންގެ އުފެއްދުންތެރި އިޙްތިޖާޖުތަށް ފުރުޅިގެން ދިޔަދީގެން ނުވާނެ ނަފްސަށް ދެވޭ އަނިޔާއަކަށް” މިހެންނެވެ. އިޙްތިޖާޖު ކުރުމަކީ އަނިޔާއާއި ބިރުދެއްކުން ނޫންކަން އެވަނީ މޫރިތި އިބާރާތް ތަކަކުން ބަޔާން ކުރައްވާފައެވެ. މިއީ މާޓިން ލޫތާރ ކިންގުގެ ނަން އެމެރިކާގެ ޤައުމީ ބަތޮލެއްގެ މަޤާމަށް އުފުލެން މެދުވެރިވި ސަބަބެވެ. މިއީ އިބުރަތް ހާސިލް ކުރަންވީ ދަރުސްތަކެކެވެ

ދިވެހިރާއްޖޭގައި މީގެ ކުރިން އަބަދުވެސް އިވޭ އަޑަކީ މުޒާހަރާއެއް ކުރާނަމަ އެއީ ވަރަށް ދަށު ދަރަޖައިގެ ޤާނޫނާއި ޚިލާފު އަމަލުތަކެއް ކަމަށެވެ. އަދި ފުލުހުން އާންމު ރައްޔިތުންނަށް އެކި ގޮތް ގޮތުން އަނިޔާ ކުރާކަމުގެ ޝަކުވާ ކޮންމެ މުޒާހަރާއަކާއި އެކު ފެންމަތިވެގެން ދެއެވެ. ނަމަވެސް މިފަހަރު މީގެ ތެރެއިން ފުރަތަމަ ބައި އެއްގޮތަކަށްވެސް ނީވެއެވެ. މީޑިއާއަށް ސަރުކާރުން އަތް ބާނާފައި ނެތުމުން ޚަބަރުތަށް ގެނެސް ދިނީ ވަރަށްވެސް އިންސާފުވެރިކޮށެވެ. މިއީ ހެޔޮ ވެރިކަމެއް ޤާއިމް ކުރުމަށް މިއަދުގެ ސަރުކާރުން ކުރާ މިންނެތް މަސައްކަތުގެ އަލިގަދަ ހެއްކެކެވެ. ކަން މިހެން އޮތް ނަމަވެސް ……………………………

މަޖިލިސް ދޮށަށް އެންމެ ފަހުން އެއްވި ފަރާތް ތަކުން ކަންކުރިގޮތާ މެދު ކޮންމެ ދިވެހި ރައްޔިތަކު ފުންކޮށް ވިސްނާލަން ޖެހެއެވެ. މަޖިލިސް ކުރާގެއަށް މެންބަރުންވަންނަން ހުރި ހުޅަނގުފަރާތު ދޮރު ބަންދު ވާގޮތަށް މުޒާހަރާގެ ބައިވެރިން ހަރަކާތްތެރިވިއެވެ. އަދި މިވަރަކުން ފުދުނީ އެއްނޫނެވެ. ލ. އަތޮޅުގެ މެންބަރު ރީކޯ މޫސާމަނިކު މަޖިލިހަށް ވަދެވަޑައި ގެންނެވި ވަގުތު ގައިކޮޅަށް އައްލައި ގަމީހު ގިރުވާނުގައި ހިފާ އަދި ޓައީއަށް ދަމާފައި ވެއެވެ. އަދި އެޓާރނީ ޖެނެރަލް އަލްއުސްތާޛާ ފާތިމަތު ދިޔާނާ ސައީދުގެ ފަހަތުން މީހަކު އައިސް އެކަމަނާއަށް ހަމަލާ ދިނުމަށް މަސައްކަތް ކޮށްފައިވެއެވެ. ނަމަވެސް ދިވެހި ހިތްވަރު ގަދަ ފުލުހުން ވަނީ އެކަމަނާ ދިފާޢުކޮށްފައެވެ. ދިޔާނާ އާއި މޫސައަށް ކުރި މި ގޯނާއަކީ ދިވެހި އެންމެ ރައްޔިތުން ހަރު އަޑުން ކުއްވެރި ކުރާނެ ކަމެކެވެ. އެފަދަ ހަޑި މުޑުދާރު އަމަލުތައް މި ދީބުގައި ހިންގުމަށް މަސައްކަތްކުރި މީހުންނަށް ދިވެހިން ތާރީޚްގައިވެސް ވަނީ ޙައްޤު އަދަބު ދީފައެވެ. މިފަހަރުވެސް ރައްޔިތުންގެ އެ ހަތުރުން ހަމަ ބިމަށް ތިރިކޮށް ޙައްޤަށް ނަސްރުދޭން ދިވެހިން ނުކުންނާނެ ކަމީ ޝައްކެއް އޮތްކަމެއް ނޫނެވެ.

އެމް.ޑީ.ޕީ އިން މުޒާހަރާ ކުރަމުން ދިޔަ އިރު، އަހަރެމެން މުޒާހަރާއެއް ނުކުރާނަމޭ މަގުމައްޗަކަށް ނުނިކުއްނާނަމޭ ބުނީ ކޮން ޕާޓީއެއްގެ ކޮން ބައެއްކަން ދިވެހިން ދަނެއެވެ. އެދުވަހު އެއީ ޤާނޫނީ ކުށެއްކަމަށާއި އެއީ ހަޑި އަމަލެއް ކަމަށް ބުނި މީހުން މިއަދު މަގުމަތީ ބުމަރު ތަކެއްހެން އެ އެބުރެނީ ކީއްވެބާއޭ ހިތައްއަރައެވެ! ގޮތް ހުސްވީ ބާވައެވެ؟ މަގު އޮޅުނީ ބާވައެވެ؟ އަނެއްކާ މޮޔަވީ ބާވައެވެ؟ މިހިރީ ހައްތަހާވެސް ހިތަށް އަރާ ފާއިބާ ސުވާލުތަކެވެ. ފުންކޮށް ވިސްނާލުމުން ސުވާލުތަކުގެ ޖަވާބު ވަރަށް ފަސޭހައިން ލިބިއްޖެއެވެ. އަހަރެމެން މުޒާހަރާއެއް ނުކުރާނަމޭ ބުނި މީހުން ނުކުމެގެން މި އެބުރެނީ ކޮށި ދަނޑު ގެއްލި ކަތިވަޅި ގެއްލި މަރިޔަބުވެސް ގެއްލުމުން ލިބުނު ފުން ހިތާމައެއްގެ ސަބަބުންނެވެ.

މިއަދު އިދިކޮޅު ޕާޓީ ތަކުން އެމް.ޑީ.ޕީން މި ކޮށާ ދިން ޑިމޮކްރެސީގެ ފުޅާ ތަނަވަސް މަގުން ހިގަން ވެއްޖެއެވެ. އަދި ދުނިޔޭގެ ތަޖުރިބާ ހޯދާބަލަން ވެއްޖެއެވެ. ދަސްކޮށްގެން ނުކުމެ ހަރުދަނާ ކަމާއެކީ އިދިކޮޅު ޕާޓީ ތަކެއްގެ ގޮތުގައި ޙަރަކާތްތެރި ވާންފަށައިފިނަމަ ރައްޔިތުންގެ ތާއީދުވެސް ލިބޭނެއެވެ. ނަމަވެސް ޑިމޮކްރެސީގެ އަސާސްތަކަށް ލޯމަރާލައިގެން ތިބެ ‘އަޅުގަނޑުމެން މުޒާހަރާއެއް ނުކުރާނަމޭ’ ބުނާ އުސޫލުން ކަންކުރަން ދިމާކޮށްފިނަމަ އެބަޔަކު މަޒީގެ ތެރެއަށް ގެއްލި ނިމިދާނެއެވެ.

ޤާނޫނުއަސާސީގެ 32 ވަނަ މާއްދާގައިވަނީ “ދައުލަތުގެ ހުއްދައެއް ކުރީން ހޯދުމަކާނުލައި ސުލްޙަވެރިކަމާއިއެކު އެއްވެއުޅުމުގެ މިނިވަންކަން ކޮންމެ މީހަކަށްމެ ލިބިގެންވެއެވެ.” މިހެންނެވެ. މި ޢިބާރާތް ކޮޅަށް ފުރިހަމައަށް އިޙްތިރާމް ކުރުމީ ކޮންމެ ދިވެހި ރައްޔިތެއްގެ ވާޖިބެކެވެ. މާތް ﷲ އަޅުނޑުމެންނަށް ހެޔޮވިސްނުން ދެއްވާށި! އަދި ފަސާދަ ކުރާ މީހުންގެ ނުބައި ކަމުން މި ވަތަން ހިމާޔަތް ކުރައްވާ އަމާންކަންމަތީ ދިރި އުޅުމުގެ ހެޔޮ ތައުފީގު އެންމެ ދިވެހިންނަށް ދެއްވާށި! އާމީން.

(މަތީގައި އެވަނީ ދެވެހި އޮބްޒާވާގައި 3 ޑިސެމްބަރ ގައި ޝާއިއު ކުރވުނު ލިއުމެކެވެ)

ބޮޑެތި ޤުރުބާނީ ތަކާއެކު، ޤައުމު އަނބުރާ ރައްޔިތުންނަށް

ތިރީގައި މިވަނީ ދިވެހި އޮބްޒާވާ (ޑީ އޯ) ގައި 3 ނޮވެންބަރ 2008ގައި ޝާއިއު ކުރެވުނު ލިއުމެކެވެ

ދިވެހި އެތައް ރައްޔިތެއް އެތައް ޤުރުބާނީއެއް ވުމަށް ފަހު މިއަދު ވަނީ ރައްޔިތުންނަށް ނަސްރު ލިބިފައެވެ. މިއީ މުޅި ދިވެހި ޤައުމުގެ ޙައްޤުގައި ދިވެހިންގެ ހިތްވަރުގަދަ ބަޔަކު ކުރި މަސައްކަތުގެ ނަތީޖާއެވެ.

އަޅުގަނޑުގެ ހިތަށް އަންނަނީ މީގެ ތިން އަހަރު ކުރިއެވެ. މުޙައްމަދު ނަޝީދު(އަންނި) އާއި އެކު މަޖިލިސް ގެއިން ނުކުމެގެން ކައިރީ ހުރި ހޮޓަލަކަށް އަރައި ކޮފީއެއްގައި ތިބެ ދެއްކި ވާހަކައެވެ. ސަރުކާރުގެ ބާރު ކުޑަވަމުން އަންނަކަމަށާ މިކަން މަޖިލިހުގެ މެންބަރުންނާ ރައްޔިތުންގެ އެހީއާއި އެކު ނިންމާލެވޭނެކަމުގެ ޔަޤިންކަމާއެކު ދައްކަމުންގެންދެވި، ޤައުމީ ރޫހުން ފުރިގެންވާ އެ ވާހަކަ ކޮޅަކީ ދުވަހަކުވެސް ހިތުން ނުފިލާނެ އަގުހުރި ފިލާވަޅުތަކެކެވެ. ކުއްލިއަކަށް މަޖިލިސް ކުރާ ގެއިން ނުކުތީ އޭ.ޑީ.ކޭ ނާޝިދުއެވެ. ނާޝިދު ނުކުތުމާއެކު އަންނި ތެދުވެގެން ވަރަށް ބާރަށް ވަޑައިގެންނެވީ އެދިމައަށެވެ. އަދި ނާޝިދުއާއި އެތައްވާހަކައެއް ދެއްކެވުމަށް ފަހު ވަޑައިގަތީ އުފާވެރި ހަބަރަކާއި އެކުއެވެ. އެ ޙަބަރު މިނިވަން ނުހުގައި އަޅާލިތާ ދުވަސްކޮޅެއް ފަހުން ޑީ.އާރު.ޕީ ދޫކުރައްވާ އިސްލާހީ ހަރަކާތުގެ ތެރެއަށް އޭ.ޑީ.ކޭ ނާޝިދު ވަޑައިގެންފިއެވެ. އެތެރެއާއި ބޭރުގައި މިފަދަ އެތައް މަސައްކަތެއް ރޭވުންތެރިކާމާއި ހިކުމަތާއިއެކު ހިގަމުން ދިޔައެވެ.

ހުއްޓުމެއްނެތި ހިގަމުން ދިޔަ މުޒާހަރާތައް ސަރުކާރަށް މަޖުބޫރުކުރުވީ ރައްޔިތުން އެދޭ ގޮތަށް ކަން ކުރުމަށެވެ. އަންހެނުންގެ މުޒާހަރާއިން ފެށިގެން މަސްވެރިންގެ މުޒާހަރާއާ ހަމައަށް ހަމަ ގޮވުނީ އެއް ކަމަކަށެވެ. އިސްލާހުކޮށް ދޭށެވެ. އިސްލާހުކޮށް ދޭށެވެ. މި އެދުން އެދެމުން ދިޔައީ ރައްޔިތުންގެ އަރިހުންނެވެ. މުޒާހަރާތައް މަގުތަކުގައި ކުރިއަށް ދިޔައިރު ސަރުކާރުގެ މުއައްސަސާސް ތަކުގައި އިދިކޮޅު ހަރަކާތުގެ ބައިވެރިންނާ ސަރުކާރާ ދިޔައީ މަޝްވަރާ ކުރެވެމުންނެވެ. އެއްބަސް ވުންތަކެއް ކޮންމެވެސް ސިފައެއްގައި ވަމުންނެވެ.

އެކިއެކި ރަށްރަށަށް ދަތުރުކޮށް ރައްޔިތުންނަށް މި އިސްލާހީ ހަރަކާތުގެ މެސެޖް ދެމުން ދިޔައިރު އެރައްރަށުގެ ތަރައްޤީގެ ޕްލޭންތައް ހުށަހައެޅެމުން ދިޔައެވެ. ރައްޔިތުން މި ވާހަކަތަކަށް އިޖާބަދެމުން ދިޔަނަމަވެސް ދިމާ ކުރުމާ ޤާއިކުން ވަކި ކުޑައެއް ނޫނެވެ. ނަމަވެސް އިސްލާހީ މަސައްކަތަށް ނުކުމެ ތިބި އެކަކުވެސް ފިޔަ ތިރިކޮށްލާކަށް އެއްބަހެއް ނުވެއެވެ.

ސިޔާސީ ޕާޓީއަކީ މާބޮޑު ބޭނުމެއް ހުރިއެއްޗެއް ނޫންކަމަށް ބުނަމުންދިޔަ މީހުންނަށް ފުރިހަމަ ޑިމޮކްރަސީއެއްގައި ޕާޓީގެ ދައުރު އޮޅުން ފިލުވާ ދިނުން އެއީ ނުވާނެކަމެއް ކަމަކަށް އިސްލާހުގެ އެކަކުވެސް ނުދެކެއެވެ. މިނިވަން ޑިމޮކްރެޓިކް ވެއްޓެއްގައި ރީތި ގޮތުގައި ޖަދަލު ކުރުމަކީ ކޮންމެހެން ކުރަން ޖެހޭނެ ކަމެއްކަމަށް މުޅި ދިވެހިން އެއްބަސް ކުރުވުން މީ ވަކިން އުދަގޫ ކަމަކަށްވިއެވެ. ނަމަވެސް އެއީވެސް ހަމަ ކުރެވޭނެ ކަމެއް ކަމަށް އިސްލާހީ ހަރަކާތުގެ ބައިވެރިން ދެބަހެއް ނުވެއެވެ. ދިވެހިންގެ މި ލޮބުވެރި ބިމުގައި ޑިމޮކްރަސީގެ މިއަސާސްތައް އަށަގެންނެވުމުގައި މިވެރިން ދިޔައީ ހޭބޯނުލާ މަސައްކަތް ކުރަމުންނެވެ. ގިނަވަގުތުތަކެއް އެކަމުގައި ހޭދަ ކުރަމުންނެވެ.

ހަރުދަނާ އިދިކޮޅު ޕާޓީއެއްގެ މުހިންމުކަންދެކެ މިފަދަ ޕާޓިއެއް އުފެއްދޭތޯ ގަދަ އަޅާ ކުރެވެމުން ދިޔަ މަސައްކަތަކީ އަދި އުދަގޫ ކަމަކަށްވިއެވެ. އިދި ކޮޅު ހަރަކާތައް ސަރުކާރުގެ ބައެއް ބާރުތަކުން ބާރު ފޯރުވަމުން ދިއުމާއިއެކު މާޔޫސީކަމެއް ބައެއް މީހުންގެ މޫނުމަތިން ފެނުނު ނަމަވެސް ހަމަ ހިލާ ދުލެއް ނުދޭނަމޭ ބުނެ ޖޯޝާ ޤައުމީ ރޫޙުގައި ނުކުމެ ތިބި މީހުންނަށް ކަހާތަން ކަހައޭވެސް ހިތައް ނާރައެވެ.

ރައްޔިތުންނާ ހަމައަށް ހިޔާލު ފޯރުކޮށް ދެވެން ހުރި ދައުލަތުގެ ވަސީލަތްތައް ސަރުކާރުގެ ބޭނުމަށް އަޅުވެތި ކުރެވިފައި ވީނަމަވެސް އިސްލާހީ ހަރަކާތުގެ އެކެއްގެ އަޒުމަކަށްވެސް ބަދަލެއް ނާދެއެވެ. އެކަންކަން އިސްލާހު ކުރުމަށް ގޮވާލުމާއި އެކު އެހެން މަގެއް ހޯދައިގެން ރައްޔިތުންނާއި ހަމައަށް ދިޔައެވެ. އަދި ބޭއިންސާފު ނައްތާލުމަށް ތަކުރާރުކޮށް ގޮވަމުން ގެންދިޔައެވެ. މިނިވަން ނޫހުގެ ފުރަތަމަ އަދަދާއެކު ލިއުމުގައި އަޅުގަނޑު ކުރިޔަށް ދިޔައިރު އެންމެ ގިނައިން ކުރާ ސުވާލަކީ ތި ނޫސް ކިހާ ދުވަހަކު ހިގާނެބާ އޭ ؟ ބުނެ ކުރާ ސުވާލެވެ. މިނިވަންގެ އެއްހަރަކާތް ތެރއަކު އެދުވަސްވަރު ބުނީ ” މިނޫސް މަހެއްހާ ދުވަހު ނެރެވުނަސް ރަގަޅު” ކަމަށެވެ. އެފަދަ މާ ހައުލެއްގައި މަސައްކަތް ފެށުމާއި އެކު އެތައް ނޫހެއް ވުޖޫދައް އައިސްފިއެވެ. މުޅި ނޫސްވެރިކަމުގެ މާހައުލު ބަދަލުކޮށްލައިފިއެވެ. ޑީ އޯގެ އެތައް “ދަރިންނެއް” އުފަން ކުރުވައިފިއެވެ.

ހައްޔަރުކުރުމާ، ހަރުގެ ރޫޅުމާ އަދި އިންޒާރުތަކަށް ބިރުން ސިހި ދެތިން މީހަކު މައިތިރި ވިޔަސް ގިނަބަޔަކު ދުލެއް ނުދިނެވެ. ދޭތިން އެކެއްޗަށް ހިފަމުން ގެންދިޔައެވެ.

މިފަދަ އުދަގޫ ދަތި ގޮތަކަށް ސިޔާސީ ހަރަކާތް ހިންގަމުންއައިސް އެހަރާތުގެ ބައިވެރިން މިފަހަރުގެ އިންތިހާބުގައި ވާދަކުރީ ފުރިހަމަ ޔަޤީންކަމާއި އެކުއެވެ. ދިވެހި ލޮބުވެތި ރައްޔިތުންނަކީ ވިސްނުންތެރި ބައެއްކަން އެގިތިބެއެވެ. އިސްލާމް ދީނުގެ މާތް މަތިވެރި އުސޫލުތަކަށް ބާރު ލިބޭނެ ކަމުގެ އުންމީދުގައެވެ. މާތް ﷲ ވޮޑިގެންވަނީ ޙައްޤުގެ މަތީގައި ތިބި މީހުންނާ އެކުގަކަން އެގިތިބެއެވެ. އަދި އެކަލާންގެ ވައުދު ފުޅު ކަމުގައިވާ، ނުހައްޤުން ގެއްލުން ލިބޭ މީހުން ގެ ދުޢާ އިޖާބަ ކުރައްވާނެ ކަމާ ޙައްޤަށް ނަސްރުދެއްވާނެ ކަމުގެ ޔަޤީން ކަމާއި އެކުގައެވެ.

އަޅުގަނޑުމެން އިތުބާރު ކުރަނީ ހަމައެކައި ﷲ އަށެވެ. އަޅުގަނޑުމެން އެދެނީ މިނިވަން ދީމިޤްރާޠީ އަދި ޤާނޫނީ ވެރިކަމެކެވެ

ޤާނުނުއަސާސީގެ ބާރު ފެންނަމުން ޤައުމު ކުރިޔަށް

އަޅުގަޑުގެ ހަޔާތުގެ މިހާ ހިސާބަށް ފެނުނު އިންތިހާބުތަކާއި ހިލާފަށް މިފަހަރު ފެނުނީ މުޅިން ތަފާތު މަންޒަރެކެވެ. ކުރިން މުޅިންވެސް ބޭއްވިފައި ވަނީ ހިޔާލު ހޯދުމުގެ ވޯޓެވެ. މިއީ ފުރަތަމަ ޑިމޮކްރެޓިކް އިންތިހާބެއް ބޭއްވިފަހަރެވެ. މީގެ ކުރިޔާ ހިލާފަށް ރައީސް ކަމުގައި ހުރި ބޭފުޅާއަށް ލިބިލެއްވީ 40% އެވެ. މީގެ ކުރިން އެބޭ ފުޅާއަކީ 90% އިން މަތި ހޯއްދަވާ ބޭފުޅެކެވެ. އެހެން ކަމުން މިމަހު 8 ގައި މިބޭއްވުނު އިންތިހާބަކީ ދިވެހި ތާރީހްގައި ފާހަގަކޮށްލެވޭނެ ވަރަށް މުހިންމު އިންތިހާބެކެވެ. އަޅުގަޑު ދެކޭ ގޮތުގައި ކުރިޔަށް މިއޮތީ ޤާނޫނުއަސާސީގެ ފަސް އަހަރެވެ. މިހެން ބުނަން މިޖެހެނީ މިފަސް އަހަރަކީ ޤާނޫނުއަސާސީއަށް ފުރިހަމަ ބާރު ދިނުމަށް ކުރަންޖެހޭ ވަރަށް މުހިންމު މަސައްކަތްތަކެއް ކުރަންޖެހޭ ފަސް އަހަރެވެ

ރާއްޖޭގައި ފުރިހަމަ ޑިމޮކްރެޓިކް ވެއްޓެއް ގާއިމްކުރުމަށް ބާއްވަންޖެހޭ އިންތިހާބު ތަކާއި ހަދަންޖެހޭ ޤާނޫނުތައް ހެދުމަށް ބާރުއެޅުމާއި ގާއިމް ކުރަންޖެހޭ މުހިންމު މުއައްސަސާތައް ގާއިމް ކުރުންފަދަ ކަންކަން ކުރަން އެބަޖެހެއެވެ

ޤާނޫނުއަސާސީގެ 301 ވަނަ މާއްދާގެ ދަށުން ބޭއްވުނު ރިޔާސީ އިންތިހާބުގެ ފުރަތަމަ ބުރު މިވަނީ އެއްވެސް ބޭފުޅަކަށް ކާމިޔާބު ނުކުރެވިފައެވެ. އެހެން ކަމުން ޤާނުނުއަސާސީގެ 111 ވަނަ މާއްދާގެ (ހ) ގައި ވާފަދައިން މިވަނީ ދެވަނަ ބުރަކަށް ދާންޖެހިފައެވެ. އެމާއްދާގައިވަނީ “ރައިސުލްޖުމްހުރިއްޔާކަމަށް މީހުންގެ ފަންސާސް އިންސައްތައަށް ވުރެ ގިނަ ވޯޓް އެ މީހަކަށް ލިބިގެންނެވެ. ރިޔާސީ އިންތިހާބަށް ކުރިމަތިލާ މީހުންގެ ތެރެއިން އެއްވެސް ކެންޑިޑޭޓަކަށް ފަންސާސް އިންސައްތައަށް ވުރެ ގިނަ ވޯޓް ނިލިބިއްޖެނަމަ އެ އިންތިހާބު ބޭއްވުނުތާ އެކާވީސް ދުވަހުގެ ތެރޭގައި އިންތިހާބުގެ ދެވަނަ ބުރެއް ބާއްވާން ވާނެއެވެ. އިންތިހާބުގެ ދެވަނަ ބުރުގައި ވާދަކުރާނީ އިންތިޚާބުގެ ފުރަތަމަ ބުރުގައި އެންމެ ގިނަ ވޯޓު ލިބުނު ދެ ކެންޑިޑޭޓުންނެވެ. އިންތިޚާބުގެ ފުރަތަމަ ބުރުގައި އެންމެގިނަ ވޯޓުލިބުނު ދެ ކެންޑިޑޭޓުންނަށް ވޯޓް ލިބުނީ އެއް ޢަދަދަކަށް ކަމުގައިވާނަމަ، އިންތިހާބުގެ ދެވަނަ ބުރުގައި ވާދަކުރާނީ އެދެ ކެންޑިޑޭޓުން އެކަންޏެވެ. އިންތިހާބުގެ ފުރަތަމަ ބުރުގައި ދެވަނައަށް އެންމެގިނަ ވޯޓް ލިބުނީ ދެ ކެންޑިޑޭޓަކަށް އެއް އަދަދަކަށް ކަމުގައިވާނަމަ، އިންތިޚާބުގެ ދެވަނަ ބުރުގައި ވާދަކުރާނީ ފުރަތަމަ ބުރުގައި އެންމެ ގިނަވޯޓު ލިބުނު ކެންޑިޑޭޓާއި ދެވަނައަށް އެންމެގިނަ ވޯޓްލިބުނު ދެ ކެންޑިޑޭޓުންނެވެ

އެހެން ކަމުން ޤާނޫނުއަސާސީގައި ވާފދައިން ދެވަނަ ބުރުގެ ވޯޓްލުން މިމަހުގެ 28ގައި ބޭއްވޭނެއެވެ. ޤާނޫނުއަސާސީ އުފެދުމަށްފަހު ކަންތައްތައް ބަދަލުވަމުން މިދަނީ ބައެއް މީހުން ހީވެސް ނުކުރާ ކަހަލަ ގޮތަކަށެވެ. އަޅުގަޑާއެކު ކިޔަވަން އުޅޭކުއްޖަކު ކައިރީ ދެވަނަ ބުރަކަށް ދާންޖެހޭނެތޯ މީގެ ތިން ހަފުތާ ކުރިން އަހާލުމުން ބުނީ ދާން ނުޖެހޭނެ ކަމަށެވެ. އޭނަ މިހެންބުނީ މަހާރުގެ ރައީސްއަށް މީގެ ކުރީ ހިޔާލު ހޯދުގެ ވޯޓް ތަކުގައި މަތީ ކާމިޔާބެއް ލިބިފަ އޮތީމައެވެ. ނަމަވެސް މިފަހަރު އެންމެ ފަރާތްތަކަށް ފެނުނީ ޤާނޫނުއަސާސީގެ ބާރެވެ. ޤާނޫނުއަސާސީގެ ދަށުން ކުޅިކުޅިއަށް އިންތިޙާބު ކާމިޔާބު ނުކުރެވޭނެ ކަމެވެ

ރާއްޖޭގެ ފުރަތަމަ ސްޕްރީމް ކޯޓް އުފެދިއްޖެ

ޤާނޫނުއަސާސީގެ 283 ވަނަ މާއްދާގެ (ހ) ގައި ވާފަދައިން ރާއްޖޭގެ އަދުލު އިންސާފު ޤާއިމް ކުރުމުގެ އެންމެ މަތީ ބާރު މިއަދު އުފައްދަވައިފިއެވެ. ރައްއިތުންގެ މަޖިލިހުން ރައީސުލް ޖުމްހޫރިއްޔާ ފޮނުއްވި ފަސް ނަން ބަލައި ގަނެ މިއަދު ވަނީ، ސްޕްރީމް ކޯޓް ރަސްމީ ގޮތުން  އުފައްދަވާފައެވެ. މިއީ ޤާނޫނުއަސާސީގެ އިންތިޤާލީ ކަންތައްތަކާއި ބެހޭ ބާބުގެ ދަށުން އުފެއް ދުނު އިންތިޤާލީ ސްޕްރީމް ކޯޓެކެވެ. މިކޯޓް ދެމި އޮންނާނީ ޤާނޫނުއަސާސީގެ 145 ވަނަ މާއްދާގައި ބަޔާން ވެފައިވާ ސްޕްރީމް ކޯޓް އުފެދެން ދެނެވެ

ސްޕްރީމް ކޯޓަށް އައްޔަން ކުރުމަށް ރައިސުލްޖުމްހޫރިއްޔާ ފޮނުވި ނަންތަކާއި މެދު މިއަދު ރައްޔިތުންގެ މަޖިލިހުގައި ބަހުސް ހޫނުވެގެން ދިޔަނަމަވެސް އެނަންތައް ވަނީ ފާސްވެފައެވެ. އެގޮތުން އަހުމަދު ފާއިޒު ޙަސަން، 41 އަހަރު އަކީ ހައިކޯޓްގެ އުސްފަޑިޔާރެވެ. އަބްދުﷲ ސައީދު، 44 އަހަރަކީ އެޓާނީ ޖެނެރަލްގެ ނައިބެވެ. އަބްދުﷲ އަރީފް 39 އަހަރަކީ ، ޖިނާއީ ކޯޓްގެ އިސްޤާސީއެވެ. މިޖުތާޖު ފަހުމީއަ، 48 އަހަރަކީ މަދަނީ ކޯޓުގެ އިސްޤާސީއެވެ. އަދި ޔޫސުފު ހުސެއިން ، 44އަހަރަކީ އާއިލާއާއި ބެހޭ ކޯޓްގެ އިސްޤާސީއެވެ

މިއެންމެ ބޭފުޅުންގެ ނަމަށް ވޯޓަށް އެއްސެވީ ވަކިވަކިންނެވެ. ވޯޓާ މެދު ހިތް ހަމަ ނުޖެހިގެން ހާޒިރުވި 48 މެންބަރުންގެ ތެރެއިން 14 މެންބަރުން ޖަލްސާ ދޫކުރެއްވިއެވެ. މި 14 ބޭފުޅުން މަޖިލިސް ދޫނުކުރެއްވި ނަމަ މިއަދު އެތަނުން ވޯޓް ލިބުނު ގޮތަށް ބަލާއިރު މި ބޭފުޅުންގެ ތެރެއިން ފާސްވުމުގެ ފުރުސަތުއޮތީ ހަމަ އެކަނި ދެބޭފުޅަކަށެވެ. އެއީ އަހުމަދު ފާއިޒް އާއި އަބްފުﷲ ސައީދު އެވެ. އެދެ ބޭފުޅުންނަށް މަޖިލިސް ދޫނުކުރަށްވާ ބާކީ ތިއްބެވި މެންބަރުންގެ ތެރެއިން 3 ވޯޓް ނުލިބެއެވެ. އެހެން ކަމުން ނުކުމެ ވަޑައިގެން 14 މެންބަރުންނާ މިތިން މެންބަރުން ލުމުން 1/3 ލިބިގެންދާނެއެވެ. ހަމަކިރިޔާ 2/3 އެދެ ބޭފުޅުންނަށް ލިބެއވެ. ނަމަވެސް ދެންތިއްބެވި ފަޑިޔާރުން ނަށް 2/3 ބައި ލިބި ވަޑައި ނުގަންނަވާނެކަން ކަށަވަރެވެ. އެއީ އެވޯޓްގައި 2/3 ބައި ހޯދަން ޖެހެނީ ހާޒިރުވި މެންބަރުންގެ ތެރެއިން ކަމަށް ވާތީއެވެ

ރިޔާސީ އިންތިޚާބު އަންނަ މަހު 8 ގައި

މިރޭ  ދަރުބާރުގޭ 25 ގައި ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަން އިން އިންތިޚާބު ބޭއްވޭ ތާރީހް އިއުލާން ކުރައްވައިފިއެވެ. އެކޮމިޝަންގެ ފަރާތުން އިންތިޚާބު ބޭއްވުމަށް ހަމަޖައްސަވާފައިވަނީ މިއަންނަ މަހު 8 ގައެވެ. އަދި އިންތިހާބަށް ކުރިމަތި ލުމުގެ ފުރުސަތު ވަނީ ހުޅުވާލައްވާފައެވެ. މިއީ ޤާނޫނުއަސާސީގައި ބަޔާން ކުރެވިފައިވާ ފަދައިން 10 އޮކްޓޯބަރުގެ ކުރިން އިންތިޚާބު ބޭއްވޭތޯ އެޅުއްވި ފިޔަވަޅެކެވެ. އިލެކްޝަން ކޮމިޝަންއިން ވަނީ ޤާނޫނުއަސާސީގައިވާ ރައިސުލްޖުމްހޫރިއްޔާކުގެ މަޤާމަށް އިންތިޚާބުކުރެވޭ މީހެއްގައި ހުންނަންވީ ޝަރުތުތަށް ވެސް ނޫސްވެރިންނަށް އިއްވަވާފައެވެ. އެއީ

ހ. ދިވެހި މަންމައަކާއި ދިވެހި ބައްޕައަކަށް އުފަން ދިވެހި ރައްޔިތަކު ކަމުގައިވުން އަދި ބޭރުޤައުމެއްގެ ރައްޔިތަކު ކަމުގައި ނުވުން

ށ. މުސްލިމަކު ކަމުގައި ވުމާއި، ސުންނަތް ޖަމާއަތުގެ މީހަކު ކަމުގައިވުން

ނ. ޢުމުރުން ތިރީސްފަސް އަހަރުވެފައިވާ މީހަކުކަމުގައިވުން

ރ. ބުއްދި ހަމައަށްހުރި މީހަކު ކަމުގައިވުން

ބ. އަދާކުރާންޖެހޭ ސާބިތު ދަރަންޏެއް އޮތް މިހަކު ނަމަ، އެ ދަރަނި ޚަލާސްނުކޮށް ހުރި މީހަކު ކަމުގައި ނުވުން

ޅ. ޖިނާއި ކުށެއް ކުރިކަން ސާބިތުވެގެން ބާރަ މަސްދުވަހަށްވުރެ ދިގު މުއްދަތެއްގެ ޙުކުމެއް ކުރެވިފައިވާ މީހަކު ނަމަ، އެ ހުކުމް ތަންފިޛުކޮށް ނުމުނުތާ ނުވަތަ އެ ޙުކުމުން ކަނޑައެޅިގެން އަދަބު މަޢާފުކުރެވުނުތާ ތިންއަހަރު ވެފައިވާ މީހަކު ކަމުގައިވުން

ކ. މި މާއްދާގެ ޅ ގައި އެހެން އޮތްކަމުގައިވީ ނަމަވެސް އެ މީހަކީ އިސްލާމްދީނުގައި ހައްދު ކަނޑައެޅިފައިވާ ކުށެއް ނުވަތަ މަކަރާ ޙިލަތް، ޓެކުން، ޚިޔާނާތްތުގެ ކުށެއް ކުރިން ޝަރީޢަތަށް ސާބިތުވެފައިވާ މީހެއްކަމުގައި ނުވުން. މިއެވެ. އެހެން ކަމުން މިޝަރުތުތަށް ފުރިހަމަވާ ކޮންމެ ފަރުދަކަށްވެސް ރައީސްކަމަށް ކުރިމަތި ލެވޭނެއެވެ

ޤާނޫނުއަސާސީގެ 301ގެ (ހ) ގައި ވަނީ “މި ޤާނޫނުއަސާސީގެ ދަށުން ބާއްވާ ފުރަތަމަ ރިޔާސީ އިންތިޚާބު 2008 އޮކްޓޯބަރ 10 ވަނަ ދުވަހުގެ ކުރީން ބާއްވައި ނިންމާންވާނެއެވެ.” އެހެން ކަމުން އިލެކްޝަން ކޮމިޝަނުން ނިންމެވި މިނިންމުމަކީ ވަރަށް މުހިއްމު ނިންމުމެކެވެ. ކޮންމެ ގޮތެއްވިޔަސް ފުރަތަމަ ބުރު ޤާނޫނުއަސާސީއާއި އެއްގޮތަށް ބޭއްވުމުގެ ޔަޤީންކަން މިއޮތީ ލިބިފައެވެ. ނަމަވެސް އުފެދޭ ސުވާލަކީ ދެވަނަ ބުރަކަށް ދާން ޖެހިއްޖެ ނަމަ ދެން ހަދާނީ ކިހިނެއް ތޯއެވެ؟ ޤާނޫނީ ހުސްކަމެއްގެ ތެރެއަށް ޤައުމު ވެއްޓިދާނެތީ ހަމަ ޔަޤީނުންވެސް އަޅުގަޑު އިންތިހާއަށް ކަންބޮޑުވެއެވެ

އިންތިޚާބާބެހޭ ދެބިލު މަޖިލިހުގެ ތަޅުމަށް އަންނަ ހަފުތާގައި

ޤާނޫނުއަސާސީގެ 301 ވަނަ މާއަދާގައިވަނީ “(ހ) މި ޤާނޫނުއަސާސީގެ ދަށުން ބާއްވާ ފުރަތަމަ ރިޔާސީ އިންތިހާބު 2008 އޮކްޓޯބަރު 10 ވަނަ ދުވަހުގެ ކުރީން ބާއްވައި ނިންމާންވާނެއެވެ

މިގޮތުން ބަލާއިރު މިހާރު ބާކީ އޮތީ މަހަކަށްވުރެ ކުޑަ ދުވަސް ކޮޅެކެވެ. މިދުވަސް ކޮޅުގައި އިންތިހާބާ ބެހޭ އެހެނިހެން ކަންކަމަށްވެސް ވަގުތު ދޭން ޖެހެއެވެ. އެގޮތުން ވޯޓްލާނެ މީހުންގެ ލިސްޓް އިޢުލާންކޮށް އެލިސްޓް ސައްހަތޯ ބެލުމާއި އިންތިހާބައި ބެހޭ އެއްވެސް މައްސަލައެއް އޮތްނަމަ އެމައްސަލަ ކޯޓަށް ހުށަހެޅުމަށް ވަގުތުދިނުމާއި އަދި ދެވަނަ ބުރަކަށް ދާން ޖެހިއްޖެ ނަމަ އަމަލުކުރާނެ ގޮތެއް ކަޑައެޅުން ފަދަ ކަންކަން ހިމެނެއެވެ. ސުވާލަކީ މިކަންކަމަށް ވަގުތު އެބައޮތް ތޯއެވެ؟

ކޮންމެއަކަސް މިނިވަން ނޫހަށް ދާޚިލިކަން ކަމުގެ ކޮމިޓީގެ މުޤައްރިރު ތ.އަތޮލު މެންބަރު ހަސަން އަފިފު ދެއްވި ބަސްދީގަތުމެއްގައި ވިދާޅުވެފައިވަނީ މިފެށޭ ހަފުތާގައި އިންތިހާބާއި ބެހޭ ދެ ބިލު މަޖިލިހަށް ހުށަހެޅޭނެކަމަށެވެ. “ދެގަޑީރާ ބައިން (މުތާލިއާކޮށް) މިނިންމާލެވުނީ 13 މާއްދާ. ވީމާ ބާކީ އޮތް 26 މާއްދާގެ މަސައްކަތް 5 ގަޑިއިރުތެރޭ ނިންމާލެވޭނެ” އަފީފު ވިދާޅުވިއެވެ. މިހެން ވެއްޖެނަމަ ކިތަންމެހާވެސް ރަގަޅެވެ. މިވަގުތު މަޖިލިހުގެ ރައީސްއާއި މެންބަރުން މިކަން މިހަފުތާގައި ނިންމުމަށް ކުރެވެން ހުރި ހުރިހާކަމެއް ކުރަން ޖެހެއެވެ. އިންފޮމޭޝަން މިނިސްޓަރ ނަސީދުގެ ބޮލޮގްގައި މަޖިލިހުގެ ރައީސް ފަރުވާ ކުޑަކޮށްފައި ވާކަމަށް ތުހުމަތު ކޮށްފައިވެއެވެ. މިއީ މަޖިލިހުގެ ރައީސް ކުރިޔަސް މިފަދަ ދުވަސް ވަރެއްގައި ވަރަށް ހިތާމަ ހުރި ކަމެކެވެ. މިއީ އަމިއްލަ އެދުމުގެ ކުރިޔަށް ޤައުމުގެ މަސްލަހަތު ނެރެންވި ވަގުތެވެ

އެގެން އޮތް ކަމަކީ މިއިންތިހާބު ފަސް ކުރެވެން ނެތް ކަމެވެ. ޤާނޫނުއަސާސީގެ 292 ވަނަ މާއަދާގައި ވަނީ” މި ޤާނޫނުއަސާސީގެ ދަށުން ފުރަތަމަ އިންތިޚާބުކުރެވޭ ރައީސުލްޖުމްހޫރިއްޔާއާއި ރައްޔިތުންގެ މަޖިލީހަށް އިންތިޚާބުކުރެވޭ މީހުން، އެ މީހުންގެ މަޤާމުތަކާ ޙަވާލުވުމުގެ ކުރީން މި ޤާނޫނުއަސާސީއަށް އެއްވެސް އިޞްލާޙެއް ގެނެސްގެނެއް ނުވާނެއެވެ.” އެހެންކަމުން 301ގައި ވާފަދައިން 10 އޮކްޓޯބަރު 2008ގެ ކުރިން އިންތިހާބު ބޭއްވުން އެއީ މަޖުބޫރުކަމެކެވެ. ބައެއް ސިޔާސީ ޕާޓީތަކާއި ސިޔާސީ ބޭފުޅުން އިންތިހާބު ލަސްކުރުމަށް ގޮވާލަމުން ދިޔަނަމެސް އެއި ޤާނޫނީ ގޮތުން ބަލާއިރު އެއްވެސް ބުރަދަނެއް ހުރި ކަމެއް ނޫނެވެ

ޤާނޫނުއަސާސީ ތަސްދީޤް ކުރައްވައިފި- ރައްޔިތުންނަށް ލިބުނު ބޮޑު ކާމިޔާބެއް

ރަތްއިތުންގެ ޙާއްސަ މަޖިލިސް އެއްކުރިތާ 3 އަހަރާ 11 މަހާ 7 ދުވަހުގެ ދިގުމުއްދަތަކުން ނިންމާލެވުނު އާޤާނުނު އަސާސީ މިއަދު ތަސްދީޤުކުރައްވައިފިއެވެ. ޤާނޫނުއަސާސީ ރައްޔިތުންގެ ޙާއްސަ މަޖިލިހުން ނިންމަވާލެއްވީ 26 ޖޫން 2008 ގައެވެ. އެއަށްފަހު ޙާއްސަ މަޖިލިހުގެ ރައީސް ޤާސިމް އިބްރާހިމް އާ ޤާނޫނުއަސާސީ ރައީސުލްޖުމްހޫރިއްޔާއަށް ފޮނުއްވިއެވެ. ފޮނުއްވުމަށްފަހު ތަސްދީޤު ނުކުރައްވާ ގިނަދުވަސްތަކެއް ދިއުމަށްފަހު މިއަދު ޤާނޫނުއަސާސީ ތަސްދީޤުކުރެއްވިއެވެ. މިކަމުގެ މުހިންމު ކަމަށްޓަކައި މިއަދަކީ ބަންދު ދުވަހެއްކަމުގައި ސަރުކާރުން ހަމަޖެއްސެވިއެވެ.

ހޫނު ބަހުސްތަކާއި އެކުވެރި މަޝްވަރާތަކަކުން އުފެދި އެކުލެވިގެން މިއައި ޤާނޫނުއަސާސީ އުފެދުމުގެ މަރުހަލާތަކުގައި ތަފާތު ސިޔާސީ ހަރަކާތްތަކެއް ހިގަމުން ދިޔައެވެ. ޤާނޫނުއަސާސީ މުޅިން ނިންމާލެވުނީ ތިން ރައީސް މަޖިލިހުގެ ރައީސްގެ މަޤާމަށް އައުމާއި މުޒާހަރާތަކާއެކުގައެވެ. ފުރަތަމަ ރައީސްގެ މަޤާމް ފުރުއްވީ އަބްދުﷲ ހަމީދެވެ. އެއަށްފަހު އައްބަސް އިބްރާހީމެވެ. އައްބާސްގެމަށްޗަށް އިތުބާރުނެތް ކަމުގެ ވޯޓް ދެފަހަރު މަތިން ނެގިގެން ދިޔައެވެ. ދެވަނަ ފަހަރު މިވޯޓްގައި އައްބާސް ސަލާމްތްވެ ވަޑައިގަތި މަހަކިރިޔާއެވެ. މީގެ ނަތީޖާއެއްގެ ގޮތުން އެމަނިކުފާނަށް މަޖުބުރުވެ ވަޑައިގަތީ އިސްތިއުފާ ދެއްވާށެވެ. އެއަށްފަހު އެމަޤާމާއި ހަވާލުވެ ވަޑައިގަތީ އދ ގެ މެންބަރު ޤާސިމް އިބްރާހިމްއެވެ. ޤާސިމްގެ ރައީސްކަމުގައި މަޖިލިހުގައި ކަންތައްތައްގެންދެވީ ވަރަށް ހިކުމަތްތެރި ގޮތެއްގައްގައެވެ. މިގެއިތުރުން ޤާނޫނުއަސާސީ އަވަސްކުރުމަށާއި ރައްޔިތުންގެ ޙައްޤުތައް އޭގެ ގޮތުގައި ދެމެހެއްޓުމަށް މުޒާހަރާތަކެއްވެސް ކުރެވިގެން ދިޔައެވެ.

ސިޔާސީ ޕާޓީތައް ގުޅިގެން އުފައްދާފައިވާ ޤައުމީ އިއްތިހާދުން ޤާނޫނުއަސާސީ ތަސްދީގު ކުރުމަށް އެކިގޮތް ގޮތުން ފިއްތުމުގެ ނަތީޖާއެއްގެ ގޮތުން ޤާނޫނުއަސާސީ އަބުރާ ނުފޮނުވާ ގޮތަށް ރައީސުލްޖުމްހޫރިއްޔާ ނިންމެވި ނިންމެވުން އެއީވެސް މިވަގުތު ފާހަގަ ކޮށްލަންޖެހޭ ކަމެކެވެ. ޤައުމީ އިއްތިހާދުގައި ހިމެނޭ ފަސް ޕާޓީގެ އެންމެ އިސްވެރިންނާއި ބައެއް މެންބަރުން ރައީސުލްޖުމްހޫރިއްޔާގެ ގަޑުވަރު(ތީމުގެ) ދޮށަށް އެއްވެ އަބުރާ ނުފޮނުވުމަށް ގޮވާލެއްވިއެވެ. މީގެ ނަތީޖާއެއްގެ ގޮތުން ޤާނޫނުއަސާސީ އަބުރާ ނުފޮނުއްވާ ގޮތަށް ނިންމިއެވެ.

އެއަށްފަހު މިމައްސަލާގައި އަމަލުކުރާނެ ގޮތަކާމެދު ވަޒީރުންގެ މަޖިލިހުގައި މަޝްވަރާވެސްކުރެއްވިއެވެ.

އިސްލާޙްކުރެވުނު ޤާނޫނުއަސާސީ ދިރާސާ ކުރެއްވުމަށް ހޮއްވެވި ވަޒީރުންގެ ކޮމިޓީގެ ރިޕޯޓާއި، އެޓަރނީ ޖެނެރަލްގެ އޮފީހުން ހުށަހެޅުއްވި ރިޕޯޓާއި ބެހޭގޮތުންވެސްއެދުވަހު ވަޒީރުންގެ މަޖިލީހުގެ ޖަލްސާގައި މަޝްވަރާ ކުރައްވައި، ވަޒީރުންނަށް ފެނިވަޑައިގަންނަވާ ޚިޔާލުފުޅުތައް ހުށަހެޅުއްވިކަމަށް ރައީސް އޮފީހުން ހާމަކުރައްވާފައިވެއެވެ.
ވީއެންމެ އަވަހަކަށް ޤާނޫނުއަސާސީ ތަޞްދީޤު ކުރައްވަން ބޭނުންފުޅުވާ ކަމަށް މިޖަލްސާގައި ރައީސުލްޖުމްހޫރިއްޔާ ވިދާޅުވިއެވެ.

ހަމަމިއާއިއެކު 23 ޖުލައި ގައި އިންފޮމޭޝަން މިނިސްޓަރ އެމަނިކުފާނުގެ އަމިއްލަފުޅު ބްލޮގުގައި މިޤާނޫނުއަސާސީ ޖުލައި 30ގައި ތަސްދީޤް ކުރައްވާނެ ކަމަށް ލިއުއްވިއެވެ. މިލިއުމާއި ގުޅިގެން ރައްޔިތުންގެ އުންމީދުތައް އާވެގެން ދިޔައެވެ. ސަބަބަކީ އެމަނިކުފާނަކީ ސަރުކާރުގެ ނިންމުންތަކުގައި މިވަގުތު ‘މުހިންމު ދައުރެއް’ އަދާކުރައްވާ ބޭފުޅެއްކަމަށްވާތީއެވެ.

29 ޖުލައި 2008 ވަނަ ދުވަހު ރައީސުލްދުމްހޫރިއްޔާ މައުމޫން އަބްދުލް ޤައްޔޫމް ނޫސްވެރިންގެ ބައްދަލުވުމެއްބާއްވާ އޮގަސްޓް 7ގައި ޤާނޫނުއަސާސީ ތަސްދީގު ކުރައްވާނެ ކަމަށްވެއެވެ. މިއީ ފިއްތުންތަކާއި ޕްރެޝަރުގެ ސަބަބުން ނިންމި ނިންމުމެކެވެ. މިނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ ބޮލުގައި އެޅިފައި މިވަނީ ވަރަށް މުހިންމު ޒިންމާއެއްކަމަށް ވިދާޅިވިއެވެ. އަދި ބައެއް އިދިކޮޅު ޕާޓީތަކުން ބުނާފަދައިން މިއީ ހަމައެކަނި ރަމްޒިކަމެއް ނޫން ކަމަށް ވިދާޅުވެ، އެމަނިކުފާނު ތަސްދީޤުކުރެއްވުމުގެ ކުރިން ކުރައްވަންޖެހޭ މަސައްކަތްތައް ކުރައްވަމުން ގެންދަވާކަމަށް ވިދާޅުވިއެވެ. އީޔޫއިން މިކަމުގައި ޕްރެސް ރިލީސްއެއް ނެރުމުގެ އިތުރުން މުޅިދުނިޔެ މިކަމަށް ޙާއްސަ ސަމާލުކަމެއް ދެއްވިއެވެ. ރައީސްގެ މިބައދަލުކޮށްލެއްވުމުގައި އީޔޫއިން ނެރުނު ބަޔާނަކީ ވަރަށްތާކުންތާކުނުޖެހޭ ގޮތަކަށް ކޮށްފައޮތްކަމެއް ކަމަށް ވިދާޅުވިއެވެ. ( މިއީ މައުމޫން ވިދާޅުވި ވަރަށް “ހަމަޖެހޭ” ބަސްފުޅެކެވެ.)

މިއަދު ހެދުނު ދިހައެއް ޖެހިއިރު ދަރުބާރުގޭގައި ބޭއްވި ދަރުބާރެއްގައި ރައީސުލްޖުމްހޫރިއްޔާ ޤާނޫނުއަސާސީ ތަސްދީޤުކޮށްދެއްވިއެވެ. މިޖަލްސާގައި ރައްޔިތުންގެ ޙާއްސަ މަޖިލިހުގެ އެންމެހާ މެންބަރުން ނާއި ސިޔާސީ ބައެއް ޕާޓީ ތަކުގެ ވެރިންނާއި ސަރުކާރުގެ އިސްފަރާތްތައް ބައިވެރިވެ ވަޑައި ގަތެވެ. އަދި ރާއްޖޭގައި ތިއްބަވާ ބޭރުގެ އިއްޒަތްތެރިން ވެސް ބައިވެރިވެ ވަޑައި ގަތެވެ.

ދިވެހި ރާއްޖޭގެ ޙަބަރުފަތުރާ ވަސީލަތްތައް ހުއްޓުވާލެވިފައިވަނީ މިކަމަށެވެ. މާދަމާގެ އުންމީދީ ޝުއޫރުތަކުން ޤައުމުގެ ހިތާއި ފިތް ދިޔައީ އެއް ވިންދެއްގައި ބަދެވިތިބެ ހަރަކާތްތެރި ވަމުންނެވެ. ޤައުމީ ޓީވީއާއި ރޭޑިއޯ އަދި އެހެނިހެން ހަބަރުފަތުރާ ވަސީލަތްތަކުން ޤައުމުގެ ހިތްތައް ބަދެލާ ރޫހާއި ޖޯޝްއިން ޖައްވު ގުގުމާލިއެވެ.

ޤާނޫނުއަސާސީ ތަސްދީޤު ކުރެއްވުމުގެ ރަސްމިއްޔާތު ފެށިގެން ދިޔައީ ޤުރުއާނުގެ ބަރަކާތުންނެވެ. އެއަށްފަހު ޤައުމާ މުހާތަބު ކުރައްވާ ވާހަކަ ދެއްކެވީ ރާއްޖޭގެ ރައީސުލްޖުމްހޫރިއްޔާއެވެ. އެމަނިކުފާނުގެ ވާހަކަ ފުޅުގައި މިހިދު ކޮޅުގައި މުޅިޤައުމުގެ ކޮންމެ މީހަކު ބައިވެރިވެ ވަޑައި ގަތުމަށް ގޮވާލެއްވިއެވެ. އަދި މިއީ ދިވެހި ރާއްޖެ ޑިމޮކްރަސީއާއި އިންސާނީ ޙައްޤުތައް އާމަރުހަލާއަކަށް ގެންގޮސް އަންއަން އޮތް ޖީލުތަކަށް ވާސިލްކޮށްދޭނެ މަތިވެރި ދުސްތޫރެއްކަމަށް ވިދާޅުވިއެވެ. އެކަކުއަނެކެއްގެ އިހްސާސްތަކަށް ބަލައިގެން މަސައްކަތް ކޮށްގެން މެނުވީ ފުރިހަމަ ދިމޮކްރަށިއަކަށް ނުދެވޭނެ ކަމަށާއި މި ޤާނޫނު އަސާސީގެ ސަބަބުން އަމިއްލަ މަސްލަހަތުގެ މައްޗަށް ޤައުމީ މަސްލަހަތުވެރިވާނެކަމަށާއި ޤައުމުގެ މަސްލަހަތާއި ޝަރަފަކީ ހަމަކޮންމެ މީހެއްގެ ކަމެއްކަމަށް ވިދާޅިވިއެވެ. އަދި އެންމެ ބޭފުޅުން ރަސްމިއްޔާތުގައި ބައިވރިވެ ވަޑައިގެންނެވީތީ ޝުކުރުދަންނަވަމުން ފުރިހަމަ ޑިމޮކްރަސީއެއްގައި ހިޔާލްތަފާތުތަކާއި އެކުވެސް ޤައުމުގެ މަސްލަހަތު ކުރިޔަށްނެރެ ބަދަލަށާއި އިސްލާހަށް އަބަދުވެސް މަރުޙަބާ ކިޔަން ޖެހޭނެ ކަމަށް ވިދާޅިވިއެވެ. ހަމައެންމެ މިއަދު އަޅުގަޑުމެން މިނަގުލުވާ ނިޡާމަކީ ޒަމާނީ ޑިމޮކްރަސިއަށް ވާސިލްކޮށްދޭނެ ނިޒާމެއްކަމާއި ހަޤީޤީ މަސައްކަތް އޮތީ ކުރިޔަށް ކަމަށާއި ޤާނޫނުއަސާސި ތަސްދީޤު ކުރިމާއިއެކު ކުރިމަތިވާ ގޮންޖެހުންތައް ނައްތާލަން ޖެހޭނެ ކަމަށް ވިދާޅުވިއެވެ.

އެމަނިކުރާނުގެ ވާހަކަ ފުޅައްފަހު ރައީސުލްޖުމްހޫރިއްޔާ ޤާނޫނުއަސާސީ ތަސްދީޤުކޮށް ދެއްވިއެވެ. އެއަށްފަހު ހަތް ބަޑިގެ ސަލާމެއްއަރުވާ ޤައުމީ ސަލާމް ކިއުނެވެ. މީގެފަހުން އޮތީ ޤާނޫނުއަސާސީ ތަސްދީޤްކުރެއްވުމުގެ ޤަރާރު ޤައުމަށް އިއްވުނެވެ. އެއަށްފަހު ޙާއްސަ ދުޢާއެއް ކުރައްވާ ދަރުބާރު ނިންމާ ލެއްވީ ޤައިމީ ސަލާމުންނެވެ.

މިޤާނޫނުއަސާސީ ތަސްދީޤު ކުރެއްވުމާއިއެކު ކުރަންހުރި ކަންތައްތައް ވަރައްވެސް ގިނައެވެ. ތިން އިންތިހާބު މިވަނީ ބާއްވަންޖެހިފައެވެ. މުސްތަގިއްލު ކޮމިޝަންތަކާއި މުއަށްސަސާސްތައް އެކުލަވާލަންޖެހެއެވެ. މިއި ގިނަ ވަގުތުތަކަކާއި ހަކަތަ ބޭނުންވާނެ ކަމެކެވެ. މީގެ ކުރިންވެސް ދިވެހިންވާނީ ޤައުމީ މިފަދަ ބޮޑަތި ކަންކަން ވަރަށްފުރިހަމަޔަށް ނިންމާފައެވެ. މިފަހަރުގެ މި ގޮންޖެހުމާއި ކުރިމަތިލައި ކާމިޔާބާއި ފާގަތިކަން ހޯދުމަކީ ޝައްކެއްނެތް ގޮތުގައި ދިވެހިރައްޔިތުންކުރާނެކަމެކެވެ.

“ތަނުގެ ޙާލަތު ބަދަލުކުރުމަށް ޢަޒުމުގައި

ތަނުގެ އެންމެން ތެދުވުމަށް މިގޮވާލަނީ”

މިދެއްވި މަތިވެރި ކާމިޔާބަށްޓަކައި ﷲއަށް ހަމްދާއި ޝުކުރުކުރަމެވެ. މިއަޅާމެނަށް ޑިމޮކްރަސީގެ މަގުގައި އިސްލާމީ އުސޫލްތަކުގެ މަތީގައި ތިބެ ހިތްވަރާއި ކެތްތެރިކަމާއި އެކުގައި ކުރިޔަށް ދިއުމުގެ ހެޔޮ ތައިފީގުދެއްވާށިއެވެ. އާމީން!

މިއަންނަ އޮގަސްޓް 7 ވަނަ ދުވަހު ޤާނޫނުއަސާސީ ތަސްދީޤުކުރައވާނެ

މިއަދު ރައީސުލްޖުމްހޫރިއްޔާ ޕްރެސް ކޮންފަރެންސެއް ބާއްވަވާ މިއަންނަ މަހު 7 ވަނަ ދުވަހު ޤާނޫނު އަސާސީ ތަސްދީޤު ކުރައްވާނެ ކަމަށްވިދާޅުވިއެވެ

މިބައްދަލުވުމުގައި އީޔޫއިން ޤާނުނުއަސާސީ ލަސްވަމުންދާތީ ނެރުއްވާފައިވާ ޕްރެސްރިލީޒްއަށްވެސް ރައްދުދެއްވިއެވެ. އެމަނިކުފާނު ވިދާޅުވީ އެއީ ތާކުންތާކު ނުޖެހޭގޮތަކަށް އީޔޫއިން ކޮށްފައިވާ ކަމެއްކަމަށެވެ. މިއީ ބައިނަލްއަޤުވާމީ ދުނިޔެއަށް އެމަނިކުފާނުގެ ލޯހުޅުވިފައިވާ މިންވަރު  ފާޅުވާ ވިދާޅޫވުމެކެވެ. ހަމަމިއާއެކު އީޔޫގެ މިޕްރެސް ރިލީސްއަށް ފޮރިން މިނިސްޓަރީން ރައްދުދެއްވާ ނޫސްބަޔާނެއް ނެރިފައިވެއެވެ

އެމަނިކުފާނުގެ ވާހަކަފުޅުގައި ރައްޔިތުންގެ ޙާއްސަ މަޖިލިހުގެ ރައީސްއަށް ސާފުނުވާ ބައެއްކަންކަން ސާފުކޮށް ދިނުންއެދި ސިޓީއެއް ފޮނުވާފައިވެއެވެ. ހަމަ މިއާއިއެކު އިދާރީގޮތުން އޭގައި އެމަނިކުފާނު ފާހަގަކުރައްވާފައިވާ ކަންތައްތައް ރަގަޅުކޮށްލެވޭނަމަ ރަގަޅުކޮށްލަ ދެއްވުމަށްވެސް އެދިފައިވެއެވެ

ވީ އެންމެ އަވަހަކަށް އާ ޤާނޫނުއަސާސީ ތަސްދީޤް ކުރަން ޖެހޭނެ

ރައްޔިތުންގެ ޙާއްސަ މަޖިލިހުން އިސްލާހުކޮށް 26 ޖޫން 2008ގައި ފާސްކޮށްފައިވާ އާ ޤާނޫނުއަސާސީ މިހާރު އޮތީ ރައީސުލް ޖުމްހޫރިއްޔާގެ އަތްޕުޅުގައެވެ. އެމަނިކުފާނަށް މިވަގުތު ކުރައްވަން ޖެހޭ އެންމެ މުހިންމު ކަމަކީ މި ޤާނޫނުއަސާސީ ތަސްދީގް ކުރެއްވުމެވެ. އެއީ ހަމައެކަނި ރަމްޒީކަމެކެވެ. އެހެނީ ޤާނޫނުއަސާސީގެ ކޮންމެ މާއްދާއެއްވެސް ފާސްވުމާއި އެކު ރައީސްއަށް ޤާނޫނުއަސާސީގައި ވާގޮތުގެ މަތިން ފޮނުވަމުން ގޮސްފައިވެއެވެ. އެހެން ކަމުން މިއަދު މިވަގުތާ ޖެހުން އިރު އެމަނިކުފާނު ހުންނަވަންވާނީ އޭގާ މައްސަލައެއްހުރިތާ ނެއްތޯ ބައްލަވާ އެ ތަސްދީގް ކުރުމަށްޓަކާ އަޅަންޖެހޭ ހުރިހާ ފިޔަވަޅެއް އަޅުއްވައިގެންނެވެ. ނަމަވެސް މިއަދު އިވެމުން މިދާ ހިތާމަވެރި އަޑަކީ އެހާ ގިނަ ދުވަސް ލިބުނު އިރުވެސް އެމަނިކުފާނުގެ މަސްއޫލިއްޔަތު އަދާނުކުރެވި އޮތް އަޑެވެ

ރައީސުލްޖުމްހޫރިއްޔާއަށް ތަސްދީގްކުރުމަށް ފޮނުވިތާ މަހެއްހާ ދުވަސްވެފައި ވާއިރުވެސް އަދިވެސް އަތްއުރާލައިގެން ހުންނެވީއެވެ. އަދި އެވަރަކުން ފުދުނީ އެއްނޫނެވެ. އެންމެފަހުން ޤާނޫނުއަސާސީ މަޖިލިހަށް ފޮނުވާ ވާހަކަވެސް ދައްކަވަން ފެށީއެވެ. މިކަން ހުއްޓުވުމަށްޓަކާ ޤައުމީ އިއްތިހާދުން ތީމުގޭ ދޮދަށް އެއްވެ، އަބުރާ ނުފޮނުވުމަށް ރައީސްއަށްވަނީ ދަންނަވާފައެވެ. އަދި އެ އިއްތިހާދުން މިހާރުވަނީ 31ޖުލައި 2008ގެ ކުރިން ޤާނޫނު އަސާސީ އިސްލާހުނުކޮށްފިނަމަ އެކަމާ އިހްތިޖާޖު ކުރެވެން އޮތް ޤާނޫނު ހުއްދަކުރާ ކޮންމެ ގޮތަކަށް އިހްތިޖާޖް ކުރާނެ ކަމުގެ އިންޒާރު ދީފައެވެ. މިކަމާ ގުޅިގެން މި ވަގުތު ރައީސް ހުންނެވީ ޤާނޫނުއަސާނީ އަބުރާ ފޮނުއްވާ ގޮތަކށް ނޫނެވެ

ރައްޔިތުން މިވަގުތު މިތިބީ ރައީސުލްޖުމްހޫރިއްޔާ ޤާނޫނުއަސާސީ ތަސްދީގުކުރެއްވުމުގެ އުންމީދުގައެވެ. އެކަމަށް ހިތާއި ދުލުން އެދި އެދިއެވެ